【Now財經台】心動公司(02400)旗下自研嘅角色扮演RPG 遊戲《出發吧麥芬》喺蘋果IOS榜排第2位，僅次於米哈遊旗下嘅《原神》，呢類遊戲嘅玩家持續性及變現能力係咪好強？ 內地近排接連有國產及進口遊戲獲批版號，而心動公司都有份，集團前景係咪逐步改善中？
博威環球證券金融首席分析師聶振邦指，《出發吧麥芬》屬於放置式遊戲，即係唔需要一路揸住電話玩，比較適合上班族，操作上只要開咗個遊戲，佢自己就會運作。佢又話，上班族嘅消費力較強，唔介意「課金」，係有利心動公司前景。
聶Sir又話，國家新聞出版處1月批出115隻遊戲，代表國家有推動遊戲嘅意向，同去年12月嘅氣氛完全唔同，好多遊戲公司嘅估值都會提升，加上去年行業整頓嘅憂慮釋除後，今年市場會更關注環球消費狀況，間接反映喺遊戲股上，呢啲公司嘅收入前景值得憧憬。
