【Now財經台】財政司司長陳茂波今日(28日)發表新一份《財政預算案》，焦點當然係宣布樓市即日起全面「撤辣」，3大辣稅全部取消，刺激本地地產股及地產代理股造好，如果依家係「撤辣」嘅合適時機，但係咪可以即時令樓市止跌，帶動整體樓市反彈？邊啲本地發展商會最受惠？
元宇證券基金投資總監林嘉麒指，其實市民買唔買樓係受稅項、息口及經濟狀況影響，因此，要解決不同問題先可以令一手回暖。佢又話，今日地產股升得唔錯，明顯係受全面「撤辣」呢個消息帶動，同埋呢類股份嘅估值已自高位調整唔少。
KK認為，「辣招」已講咗十幾年，雖然今次全面取消，但未必有市民願意喺樓價仍處於相對高位買樓，反而要留意二手業主反價，買家短期入市意欲大唔大。發展商方面，由於長實集團(01113)項目多，唔少新盤都係港鐵沿線物業，「撤辣」一定有利集團發展。KK又提醒，揀地產股時要從中長線基本面分析，留意邊個發展商囤貨較多。
