【Now財經台】據《路透》引消息指，雖然內地現時有約44家晶圓代工廠，但只有中芯國際(00981)有能力生產大量先進圖形處理器(GPU)，依家中芯產能已全部預留畀華為，但今年可能會撥出小部分畀直接受美國限制嘅晶片公司，若報道屬實，將會係一大突破。雖然中芯股價今日(5日)有得升，但升幅唔大。
元宇證券基金投資總監林嘉麒指，中芯股價今日表現，反映市場唔太相信呢個消息，不過，KK認為，只要因應中芯情況修改GPU規格，相信中芯有能力生產GPU產品。佢又話，要等到毛利率、初期產能有實際數字，先可以反映喺股價，投資者現階段仍會持觀望態度。
佢又話，反觀另一隻芯片股華虹半導體(01347)，主攻低端生產，華虹股價今日升幅較大，相信同估值有關，現時華虹市盈率(PE)逾30倍，中芯就逾40倍，令資金流入程度有差異。
揀股方面，KK建議短炒龍頭中芯，因為上望空間較大，若華虹技術方面有突破，有方法推高毛利率，股價就有較大上升優勢。
