【Now財經台】昨日(6日)好淡倉都有資金流入騰訊控股(00700)，騰訊股價今朝(7日)跟隨大市向上，更一度突破10天線，熱門嘅牛證都比較進取，距離收回價3%至7%嘅條款都多人揀，槓桿做到11至22倍，應該點平衡風險？
法興銀行證券上市產品銷售部董事周翰宏指，騰訊股價近兩周守喺350元水平，投資者都預期騰訊跑贏大市，牛證都係合適嘅選擇，收回價較貼嘅條款，雖然槓桿高，但風險都大，一旦騰訊股價失守350元就要止蝕，建議揀價外約6%，若收回價340元或以下，槓桿有13倍。
CALL輪方面，Horace表示，若認為騰訊股價可突破365元，揀貼價條款追CALL都可以，但要留意一旦股價跌穿呢個位，未必可以止蝕。
