【Now財經台】遊戲股心動公司(02400)股價今日(12日)低開逾4%後，跌幅一度擴大至逾11%，低見20.75元，收市報21元，跌逾10%，錄得4個月以來最大單日跌幅。
其實心動公司最近都有好消息，公司上月中推出類似《動物森友會》嘅育成類遊戲《心動小鎮》，推出前預約量高達300萬，上線以嚟一直穩坐內地App Store免費榜三甲位置，並喺剛過去嘅周六(10日)展開季節活動，早前，券商已預期可借助活動推動遊戲流水。
此外，心動公司上周發盈喜，估計上半年受惠於發行新遊戲，收入增長逾20%，加上毛利率上升帶動，中期可望多賺逾10%。
不過，心動公司股價已累積一定升幅，表現持續強勢，早前，20天線更升穿50天線，今日唔知係咪借行業消息跌一跌，喺接近24元有阻力，形成小雙頂，暫時頸線接近20天線，相信21元水平有支持，只要守得住呢個位，相信股價仍有上升動力。
