【Now財經台】新股市場近期非常熱鬧，有8隻新股撞期招股，其中，全城瘋搶嘅內地玩具新股布魯可(00325)熱度繼續升溫，睇返多家券商數據，暫時已借出逾5400億元孖展，公開發售就暫時超額認購逾3700倍，兩樣加埋嘅凍資金額已超越2008年3月上市嘅中國鐵建(01186)，當年中鐵建凍結逾5300億元，晉身歷來「凍資王」排行榜No.8。
未入飛嘅散戶注意，布魯可將會喺下星期二(7日)截飛，入場費都唔平，一手逾18000元，股份預期喺下星期五(10日)首日掛牌。
不過，唔係隻隻新股都有咁高熱度，可能港股2025年開局曳，投資者都比較審慎，內地城商行宜賓銀行(02596)及匯舸環保(02613)孖展出現「抽飛」情況，宜賓銀行本身仲未足額，匯舸環保就超購逾6倍。
