【Now財經台】後日(29日)就係農曆大年初一，要封利是嘅市民除咗忙於唱錢，亦四出搜羅一個有睇頭又啱心水嘅利是封，始終係一年一度嘅大日子，希望收利是及派利是都開開心心，銀行、大企業及奢侈品牌嘅利是封，一向係唔少市民心頭好，但係咪真係有價有市？
近日喺二手買賣平台，蘋果公司(Apple Inc.)嘅利是封「身價」最高，6個叫價最高3000蚊，即1個要500蚊，滙豐銀行30個都炒到3888蚊，不過，掛牌超過2星期都未有「成交」。
其他「掛牌」利是封包括:
LV嘅印咗蛇圖案利是封，最高索價1280蚊。
HERMES、Cartier及DIOR利是封，二手叫價都要幾百蚊。
瑞銀(UBS)嘅120個禮盒裝，之前索價988蚊，但之後減至880蚊。
恒生銀行(00011)嘅財神禮盒裝，最高叫價799蚊。
