【Now財經台】阿里巴巴(09988)旗下阿里影業(01060)股價今日(3日)顯著受壓，今朝平開後，隨即向下，並愈跌愈多，一度瀉逾13%，低見0.46元，收市報0.49元，仍挫逾7%，全日成交金額逾5700萬元，一口氣失守4條主要移動平均線。
消息方面，內地春節檔期票房創新高，突破75億人仔，不過，阿里影業出品嘅《封神第二部:戰火西岐》，截至昨日(2日)止，票房只有約9億人仔，遠低於之前估計嘅28億至31億人仔，點解會有咁大落差，花旗就歸咎於市場競爭。
《封神》首部曲喺2023年暑假檔期上映，當時已被視為「票房黑馬」，最終大收逾26億人仔，《封神第二部:戰火西岐》揀喺全年票房戰最激烈，一定要靠內容取勝嘅春節檔期上映，票房暫時令人大跌眼鏡。
