【Now財經台】百勝中國(09987)去年多賺10%，呢份全年成績表大致符合預期，百勝中國美股昨晚(6日)就率先反映咗業績利好因素，港股今早(7日)亦一度大升逾7%，值得留意係，雖然純利錄雙位數增長，收入只係微升，喺內需仍然疲弱下，公司盈利係慳返嚟，呢份業績市場又收唔收貨？
紅蟻資本投資總監李澤銘指，其實市場都係睇住公司慳錢嘅可持續性，喺依家內地經濟及整體結構轉變下，百勝中國租金及人工方面冇太大上升壓力，而整體經營規模增加亦可以幫到公司慳錢。收入方面，Alan就話，雖然百勝中國去年首兩季收入跌幅較大，但去年第4季同店銷售跌幅已收窄至1%，加上集團早前喺業績記者會指，農曆新年期間同店銷售已回復正數，喺呢個趨勢下，今年利潤增幅有可能擴大，而成本開支亦可以持續下降，所以市場都會收貨。
