【Now財經台】花旗最近唱好安踏體育(02020)、李寧(02331)及滔搏(06110)，其中，安踏係首選股，原因係資金輪動會炒起市值，而流動性亦比較好，以內需股百勝中國(09987)為例，曾經因資金輪動引發一輪升浪，花旗認為，安踏係下一隻會受惠於資金輪動嘅股份，呢個睇法合唔合理？
紅蟻資本投資總監李澤銘表示，佢同意安踏係3隻體育用品股中嘅首選，但唔認為板塊輪動資金會流向安踏，百勝中國之前炒起係受基本因素推動，集團業績遠勝市場預期，加上喺餐飲股中佔優，所以成功突圍。Alan又話，佢睇好安踏係因為公司基本因素明顯比內地同業優勝，同埋受惠於多品牌策略，加上呢啲品牌係收購返嚟，安踏將呢啲平平無奇嘅品牌重新包裝後，令佢哋回復相對較高嘅增長，市場普遍認為，安踏2015年至2020年嘅收購，將會喺2024至2027年步入收成期。
佢又話，安踏除咗品牌多，亦各自有唔同定位，就算依家整體消費有下調趨勢，但消費者仍會買安踏旗下品牌嘅產品，所以安踏比李寧及滔搏更有優勢。
