【Now財經台】海豐國際(01308)今日(10日)逆市造好，中午出完業績後，升幅擴大，最終以全日高位收市，報19.3元，升8.4%，成交股數較過去100日同時段平均增約2倍，成交金額逾2.3億元。
海豐呢份全年業績交到貨，收入按年升26%，純利更按年大升93%至約10.3億美元，達到盈喜上限，末期息按年大增1.8倍，全年派息約32美仙，派息比率達83%，係近幾年最高水平。
海豐股價今日一口氣升穿10天、20天及50天線，依家50天線喺18.8元，短線阻力喺19元水平，睇返近幾個月上試19元，都未試過收市可以企得穩，今日借住業績突破呢個阻力，確認企穩先有力試更高水平，不過，航運股係貿易戰風眼股，後市要留意管理層喺業績電話會議上點睇行業前景，會唔會再派特別息或做回購支持股價。
