【Now財經台】長城汽車(02333)股價噚日「死火」，但今朝高開近2%，升幅隨即擴大，一度升近5%，高見8.55元。
長汽剛出咗5月汽車產銷數據，其中，新能源車銷量較4月大增近60%，在多隻已公布5月銷售數據嘅國產新能源車股中，長汽按月升幅甚至超越比亞迪股份(01211)及哪吒汽車，海外銷量按月亦增長15%，反映銷售顯著復甦。
睇返日線圖，長汽保歷加通道正在不斷擴闊，但最近幾個交易日，股價反而逐步移離底部，有邁向中軸嘅傾向，首站可先睇中軸，即20天線，9元水平，不過，即使重返上方通道，長汽股價仍未擺脫過去3個月，喺8元至10元窄幅上落格局，市場關注官方幾時落實恢復新能源車購置稅優惠，估計將會係股價突破10元，甚至挑戰2月底嘅12元水平契機。
