【FINTERVIEW】中資電訊股新產業概念煞食

【Now財經台】中資電訊股近排升得幾誇張，中國電信(00728)及中國聯通(00762)等成板仲升緊，主要係炒作數字經濟憧憬及概念，因為當中會涉及基礎設施，加上全球熱炒嘅ChatGPT概念。此外，摩根士丹利最新估計，未來60日，3大中資電訊股有80%機會升，喺市場仍有唔少不確定性下，呢類股份係咪有得諗？

東亞銀行財富管理處投資策略師陳偉聰指，港股舊年第3季開始向下時，中資電訊股仍然好硬淨，到大市升返亦可以跟到，過去好多投資者認為呢類係防守股，但基於一啲元素，例如新產業工業互聯網，包括雲計算、AI等，令市場覺得中資電訊股有增長空間，因為面向好多企業客，而過往主要炒tech股，但隨著市場份額嘅轉變，中資電訊股嘅份額不斷升緊，雖然唔係直接參與，但背後嘅產業鏈都好強，所以有呢方面嘅增長概念。

Jason又話，如果睇返估值，市盈率(PE)仍然係單位數，息率有7厘至8厘，對比傳統科網股係有一定吸引力。