【名家給力場】有國企背景股份亂局吸金

【Now財經台】歐美金融機構輪流出事，美國最先「出事」係矽谷銀行(SVB)，其後滙豐控股(00005)以象徵式1鎊作價收購SVB英國業務，近日就輪到瑞信(Credit Suisse)「出事」，最新係瑞銀(UBS)出手打救，以30億瑞郎買起瑞信，但背後都離唔開各國政府嘅操作，或多或少扭曲咗西方市場一向崇尚資本主義嘅風氣，再睇返國企股，一直受國策主導，但市場又幾受落，當中反映咗咩投資思維？

《香港股票財技密碼》作者梁杰文指，經過幾次事件，市場發現大型銀行身上都有「國家任務」 ，只要遇上金融危機或突發事件，央行為咗挽救經濟，就會指派銀行收購，變相同市場對中資股嘅認知差唔多，都係國家指邊打邊。

Mike又話，喺外圍市場波動下，市場傾向投資有國企背景，以及同外圍經濟絕緣、唔受歐美同外圍經濟市場波動影響嘅中資股，如中國移動(00941)、電訊股及基建股等，反正環球市場嘅股份，同樣要為國家政策背書，加上中資股派息吸引，更易吸引外資。