【專家分析】港股買貨等下半年？

【Now財經台】人民銀行上星期突襲式降準，但無助港股表現，因市場仍憂慮歐美銀行業問題，恒生指數噚日收市挫逾500點，跌至逾3個月低位，金融股成跌市重災區。聯儲局會喺美國時間星期二展開一連兩日議息會議，結果會喺香港時間周四凌晨2點公布，市場另一個焦點係中俄領袖會面，港股短期有冇機會回穩？

高富金融集團投資總監梁偉民指，恒指絕對有能力回穩，歐美銀行業問題同港股冇太大關係，歐美銀行業出現信心危機，但相比之下，本港及內地銀行業應該唔會出現同類情況，其中港銀作風較保守，投資高風險資產嘅機會較小，加上資本充足比率較高，所以風險唔會太大。

Wyman又話，恒指去年底至今年初已經升咗唔少，調整至19000點水平已經好足夠，加上內地經濟復常，而數據亦反映增長動力持續加强，港股跌到現水平估值已經偏平，即使短線仍有下調空間，但去到年中至第3季尾係值博。