【專家分析】高追咗Tesla要睇實今晚份季績
【分析】 2024/07/23 09:57
![](/CMS_images/NewsImageBig/FIN-BNC-INTERVIEW-240723-0900.jpg)
【Now財經台】資金吼美股回調趁低吸納,3大指數昨晚(22日)全線高收,其中,標指及納指升1%。目前,市場最重要考慮一定係美國總統大選形勢,總統拜登(Joe Biden)宣布退選後,副總統賀錦麗(Kamala Harris)將會參選,除拜登外,民主黨內重量級人馬佩洛西(Nancy Pelosi),以及黨內多名潛在挑戰者最新亦表態支持佢,對美股有咩影響,科技股昨日反彈同選情有冇關?此外,Tesla及Google母公司Alphabet將會喺今晚(23日)美股收市報出季績,有咩要留意?
高富金融集團投資總監梁偉民指,科技股之前回套主要係之前升得太多,納指上星期回套前已累升20%,所以趁高獲利,但科技股近日反彈可唔可以持續,都要睇市場情緒係咪可以持續高漲,始終估值仍然係貴,同埋好難估頂。
Wyman又話,Tesla業績的確需要關注,集團現時仍然主要靠電動車業務撐業績,佢估計,今晚(23日)出嘅業績唔會太好,市場有機會借勢回調,Tesla股價近期大升,主要炒無人駕駛及機械人業務,但短期唔可能帶來強勁收入及盈利,所以之前高追咗Tesla嘅投資者要特別留意。
![]() | 梁偉民 高富金融集團投資總監 |