【FINTERVIEW】資金轉戰「科特估」概念股

【Now財經台】三中全會提及要深化國資國企改革，提升核心功能及競爭力，「中特估」概念股上半年表現強勁，但喺三中全會前後調整壓力開始浮現，「中特估」概念股估值今年升咗唔少，資金食糊係咪因為估值已經太貴？

臻享顧問董事總經理王良享指，依家內地市場焦點係「科特估」概念股，三中全會強調以科技為主，所以部分資金轉移至呢類股份。依家「中特估」概念股估值偏高，電訊股市盈率(PE)介乎11倍至12倍，能源股、油股PE就介乎7倍至9倍，現時出現調整主要係能源股及油股。

Tommy續指，特朗普(Donald Trump)有機會再入主白宮，佢嘅政綱中有好大篇幅同油企及油價有關，為咗遏通脹，特朗普可能會提高美國產油量及放寬監管，若美國石油產量及供應增加，就會令中資油股壓力大增。

另一方面，特朗普上場後可能會令俄烏停火，以及暫停向烏克蘭撥款，屆時石油供應就會增加。