【專家分析】信義光能毛利率短期好難改善

【Now財經台】港股今日(25日)顯著下挫，更一度失守17000關，不過，藍籌信義光能(00968)升得唔錯，依家公司收入大部分來自太陽能玻璃銷售，睇返去年業績，佔總營業額高達90%，不過，中信里昂近日全面下調光伏股盈利預測及目標價，又話現時多晶硅價格低於現金成本，需時1至2季先可以回復至溫和水平，係咪意味光伏行業毛利率會持續受壓？

耀才證券研究部總監植耀輝指，影響毛利率嘅關鍵因素係產能太勁，信光仲不斷增加生產線，令產能過剩情況惡化，又無法以出口抵銷，加上行業競爭激烈，毛利率短期好難改善。

此外，據《路透》引述印度官員指，當地計劃放寬中資對當地非敏感行業嘅投資，包括太陽能電池板及電池製造，希望帶動本土製造業發展。不過，Stanley認為，依家只係一個市場傳聞，加上印度希望進一步保護本土企業，有起色後可能再收緊投資限制，雖然短線會有利好，但中長線唔係咁樂觀。