【FINTERVIEW】中央或要等「兩會」再出手

【Now財經台】中央經濟工作會議將於月中舉行，市場等緊會唔會有措施出台，若中經會都令市場失望，港股後市係咪更難樂觀？

東亞銀行高級投資策略師陳偉聰指，炒內地政策對A股及港股有支持作用，市場一定對中經會有憧憬，一般嚟講，中經會將會為明年經濟定調，以及提出發展方向等，不過，明年經濟增長目標、財政政策、發特別國債等，就要等明年3月嘅「兩會」先會公布，所以投資者唔需要對中經會有太大期望。

Jason又話，中央喺9月底出「組合拳」救經濟，主要係當時市場氣氛悲觀，依家恒生指數企穩19000點水平，上證綜合指數亦持續喺3300點水平上落，所以中央冇再出招嘅迫切性。佢估計，短線港股將會再向下調整，直至中經會或「兩會」釋出積極訊號，所以可能要等到明年3月有實質政策出台，到時港股先有機會出現明顯升勢。