【FINTERVIEW】內地應對美關稅戰要「摸住石頭過河」(下)

【Now財經台】中央經濟工作會議召開前，中央政治局昨日(9日)搶閘開會，會議指今年經濟發展主要目標任務將順利完成，仲首次出現「加強超常規逆周期調整」呢個字眼，實施更積極嘅財政政策，同埋適度寬鬆貨幣政策，亦講明會加大「放水」力度穩股樓。值得留意係，雖然見到決心係大咗，但只係字眼上，冇提及實質數字，似乎同9月底、10月初嘅情況類似，當時市場係失望。

臻享顧問董事總經理王良享估計，中經會喺明年經濟增長目標方面，至少會暗示同今年嘅5%相若，點解睇唔實質政策數字，例如國債及專項債加碼規模，呢啲牽涉到美國總統當選人特朗普(Donald Trump)上場後會點出招，例如對華關税加幾多，市場估計，加稅唔係一刀切，可能只係個別中國貨加多啲，而所謂加60%關税只係靠嚇。佢又話，初步嚟講特朗普話要加10%關税，其實亦反映佢都擔心加關稅加得太多，會令美國通脹大升，令進一步減息嘅機會唔大，另一方面，亦要攞到足夠資金，美國先有機會減稅。

Tommy又認為，內地都要睇住特朗普最終會加幾多關税，以平均加20%關税計，涉及約千億美元，影響似乎唔係太大，內地應對政策就唔需要去到咁盡，就算之後有數字出嚟，都係要摸住石頭過河。