【期匯決算】人仔短期或下試7.35

【Now財經台】據《路透》引述消息人士指，內地明年預算赤字率或上調至4%，係有紀錄以嚟最高水平，又指將會發行預算以外嘅特別國債及專項債，希望擴大財政刺激作用，而明年經濟增長目標就維持約5%。消息傳出後，人仔反應唔大，未來人仔匯價又會點走？

連連STAR FX總經理陳欣指，其實刺激政策及寬鬆力度都冇市場預期咁大，但中央主要係求「穩」，所以人仔匯價都相對平穩，唔會有太大反應。另一方面，中央及市場都觀望緊呢啲政策嘅成效，亦係人仔唔會有太大變化嘅原因。

佢又估計，人仔短線仍會受壓，將會喺7.3水平徘徊，而喺美元有機會持續強勢，內地經濟又冇乜起色，人仔有機會跌至7.35水平。