【專家分析】揸住Apple、Tesla以外科技股要開始減磅

【Now財經台】市場憂慮美國聯儲局明年1月暫停減息，美股3大指數昨晚(18日)全線向下，其中，道指已連跌9個交易日，係1978年2月以嚟最長跌浪，並已自高位回調近4%，羅素2000指數更自高位回落5%，不過，比特幣(Bitcoin)價格持續強勢，繼續炒作「特朗普交易」(Trump Trade)，到底可以炒到幾時？

博威環球證券金融首席分析師聶振邦認為，Trump Trade仍有得炒，但當呢個因素消化後，就會陸續會見到科技股有下調壓力，例如人工智能(AI)晶片股王英偉達(Nvidia)，股價都開始回軟，因此，佢建議投資者除非仍揸住蘋果公司(Apple Inc.)或Tesla股份，否則，應要陸續做好減持嘅風險管理。

聶Sir又話，若明年聯儲局真係放慢減息步伐，將會對科技股融資成本有影響，不利股價表現，但科技股今個月回套壓力唔大，但估計明年2月嘅沽壓可能較大。