【FINTERVIEW】美明年減息次數少過預期？

【Now財經台】美國近日出爐嘅經濟數據仍然強勁，包括昨晚(17日)公布嘅11月零售銷售按月升0.7%，係9月以來最勁，亦高過預期，聯儲局會喺本港時間周四(19日)凌晨公布議息結果，減息0.25厘似乎已成定局，市場依家關注明年減息次數，係咪會比預期少？

金馬資本管理交易策略師蘇沛豐指，美國近期出爐嘅經濟數據都幾強，相信短期內冇衰退風險，加上就業市場都偏強，雖然整體經濟放慢緊，但數據亦反映聯儲局毋須大手減息，加上聯儲局主席鮑威爾(Jerome Powell)亦提及冇大手減息迫切性，所以明年減息次數係有機會少過預期。

佢又指，減息次數亦同通脹有關，雖然美國整體通脹回落緊，但速度唔理想，若聯儲局繼續睇數據決定減唔減息，相信明年減息幅度會細過預期。蘇沛豐又提醒，美國總統當選人特朗普(Donald Trump)嘅政策，尤其關税政策會係另一個不明朗因素，因為有可能推高通脹。