【期匯決算】歐元有機上試1.182至1.183

【Now財經台】美國同日本達成貿易協議後，談判焦點轉至其他大國，市傳美歐好快就會達成協議，美國商務部部長盧特尼克(Howard Lutnick)指，美日貿易協議對歐盟有參考作用，歐盟關稅稅會唔會同日本一樣都係15%？歐元後市會點走？

亨達集團助理總經理羅明立指，美日傾掂數後，美國或會向歐盟施加更大壓力，歐元兌美元近期跌至1.15水平後，已慢慢爬返上嚟，暫時仍可守住50天線，整體走勢唔算差。

Patrick又補充，歐洲經濟唔算特別突出，但近期聯儲局內部就貨幣政策嘅分歧大咗，又有唔同聲音要求減息，再加上解僱主席鮑威爾(Jerome Powell)嘅風波，令市場多咗炒作空間，歐元有機會上試1.182至1.183水平，如果突破到，下半年有機會見1.21至1.23水平。