【FINTERVIEW】美經濟有望「軟著陸」毋須大手減息

【Now財經台】美國聯儲局將於本港時間下周四(19日)凌晨公布議息結果，有大行指，若美國經濟「軟著陸」，將會利好中國股票，A股喺美國減息後12個月，有機會升25%。到底美國經濟「軟著陸」還是「硬著陸」機會較大？

法巴財富管理香港首席投資策略師譚慧敏指，美國經濟應該可以「軟著陸」，由於通脹已經回落，唔再係市場焦點，反而係就業市場，事實上聯儲局已明確表示，唔想見到就業市場再惡化，所以9月肯定會減息，只係要考慮減幅。Grace又話，睇返數據，美國經濟係明顯放慢，但仍未去到要聯儲局要大手減息，若一下子減息0.5厘，局方都會擔心造成恐慌，認為經濟好差，因此，減息0.25厘會較為合適。

雖然美國減息日子愈來愈近，但港股仍然冇乜起色，到底最大隱憂係乜嘢？譚慧敏指，主要係港股一直冇正面消息或催化劑，加上內地經濟動力持續減弱等因素。此外，一般嚟講，9月及10月市場都會比較波動，尤其外圍及美國股市，加上今年美國大選，市況波動之餘，亦會影響到港股。