【股市脈搏】炒首程睇住幾時出通告贏面大

【Now財經台】首程控股(00697)股價今早(20日)高開2%，開市報1.52元，係暫時半日低位，其後升幅逐步擴大，一度升逾8%，高見1.61元，暫時成交金額逾5700萬元。

公司開市前公布，旗下投資基金牽頭投資1家上游供應商墨現科技，主要做觸覺感測器，進一步加強喺機械人產業鏈嘅部局。

集團今年2月開始，最少出咗6張同投資機械人產業有關嘅通告，即平均每個月超過1張通告係涉及新投資，股價亦自2月起脫胎換骨，由毫子股變蚊股，雖然近月機械人概念熱潮冷卻，但股價仍企穩1蚊樓上。

技術走勢方面，首程股價今年強勢，昨日(19日)跟隨大市急挫，一度試穿100天線支持，但今日一出通告，又再踢高股價，一度上試10天線，但似乎有啲阻力，炒呢隻股不妨留意公司幾時出通告，做即日短線部署。