【專家分析】Model 2或會拖低Tesla毛利率

【Now財經台】Tesla業績表現亮麗，帶動股價於美股昨晚(23日)延長交易時段一度抽升12%，但在港上市嘅概念股未見異動，電動車股更要跟大市跌，Tesla擬明年上半年開始生產市傳嘅Model 2，呢款車會唔會左右Tesla未來股價走向？相關概念股又可唔可以受惠？

耀才證券研究部總監植耀輝指，Tesla今次重申要生產更平價嘅車型，可以低至20000美元一架，一旦開始生產，受規模效應影響，相信首一、兩批新車會壓低Tesla毛利率，睇返今次呢份業績，毛利率升得咁好係因為成本開支減少咗，亦唔排除Tesla之後靠呢招提升毛利率。

至於Robotaxi，佢指出，要睇明數據係咪真係達標，同埋技術方面有冇突破，如果之後Tesla股價可以保持升勢，相信相關概念股都可以受惠，短線炒上去亦唔出奇，但Tesla概念股嘅股價仍處於低位，建議睇定啲再做部署。