【期匯決算】英鎊短期應可守住1.25

【Now財經台】英倫銀行一如預期維持利率不變，英鎊喺議息結果出爐後向下，市場認為，會後聲明較預期「鴿」，而英倫銀行亦下調今季經濟增長預測至零增長，加上早前公布嘅11月核心消費物價指數(CPI)低過預期，暫停減息係咪合理？英鎊後市又會點走？

瑞穗銀行首席亞洲外匯策略師張建泰指，英倫銀行按兵不動符預期，英鎊下跌係同投票結果有關，今次係以6票對3票維持利率不變，反對嘅3位委員認為要減息0.25厘，令市場覺得英倫銀行仍有減息空間，加上美國聯儲局明年或只減息兩次，刺激美元急升，喺美元強勢下，其他貨幣都偏弱。

Ken又話，除咗美國總統當選人特朗普 (Donald Trump) 上場後嘅關稅政策，加上英國明年經濟增長都睇得比較淡，都會拖累英鎊，短期而言，英鎊應可守得住1.25水平。