【Now財經台】光伏股金陽新能源(01121)噚日收市後出通告，話要進軍澳洲市場，收購一間澳洲電力公司51%股權，成為控股股東。金陽今朝低開1%後，好快轉升，升幅更不斷擴大，下晝一開市買盤就湧入，股價一度升逾8.7%，高見7.55元，暫時仍企穩7元樓上，成交股數較過去100日同時段平均增逾倍，不過，其實金額只得2000幾萬元。
前身係主攻鞋業嘅寶峰時尚，舊年8月易名金陽新能源，當時食住光伏股個勢大幅炒上，但好快又打回原形，公司今年出咗幾份業務發展通告，但股價都冇乜突破，雖然金陽2021年度終於「止血」，扭轉7連蝕嘅劣勢兼有錢賺，但其實都只係賺約920萬人仔。
