【Now財經台】內地今朝出咗6月官方製造業及非製造業採購經理指數(PMI)，雙雙重返擴張區，不過，製造業PMI差過預期，但服務業PMI就遠超預期。如果由上海解封起計，今季真正全面復工復產嘅時間只得6月，係咪唔好對第2季GDP抱太大期望？
盛寶金融大中華區市場策略師黃永輝指，第2季真係唔會抱太大期望，睇返4月係嚴重受封城影響，5月就有少少鬆綁，去到6月就稍為回復正常，如果按季比較，第2季GDP應該會錄得負增長。佢又話，值得留意係，內地經濟數據一般係按年比較，有別於美國一般係按季比較，如果真係咁樣，第2季GDP就可能錄得輕微正增長。
