【Now財經台】截至早上11時止，1小時內《彭博》用戶關注度上升最多港股，依次為海螺水泥(00914)、中國石油股份(00857)、雅居樂集團(03383)、快手(01024)及聯想集團(00992)。
海螺股價今朝大跌，似乎內房弱勢已蔓延至水泥股，摩根大通今日出咗一份31頁嘅水泥股報告，下調咗水泥股目標價，其中下調海螺目標價13%至46元。報告又睇淡水泥股第2季業績，估計純利按年跌33%至84%，似乎內房一日未走出谷底，相關產業嘅股份都撈唔過？
大華繼顯執行董事梁偉源指，內房問題已困擾經濟及市場好耐，到依家都未有徹底解決方案，估計內房相關產業面對嘅問題會陸續浮現。
佢又話，內房需求疲弱，除咗影響水泥業，更要面對能源及煤炭成本上升問題，即使近期內地擬增加基建項目，但海螺嘅水泥一般係用於房地產，所以未必可以受惠於基建加碼，由於房地產市場暫時都睇唔到有全面復蘇跡象，相信水泥業仍未可以走出困境。
