【Now財經台】總結截至早上11時止，1小時內《彭博》用戶關注度上升最多港股，依次為吉利汽車(00175)、金科服務(09666)、龍光集團(03380)、瑞聲科技(02018)、中國宏橋(01378)。
今日汽車股強勢，消息面又係上周五召開嘅國務院常務會議，重申延長免徵新能源車購置稅，又話限購地區要增加汽車指標數量，事實上，新能源車購置稅自2014年起，今次已經係第3度延長，如果純粹炒呢個消息，點解吉利特別升得勁？
富昌證券聯席董事譚朗蔚指，約2個月前個別城市解封時，汽車板塊配合稅務寬免率先炒作，但到6月尾已經炒完，甚至跌返落嚟，依家政策消息再出，最多係睇好中長線嘅誘因，而唔係當新聞咁炒作，吉利7月公布咗「極氪001」車輛交付逾5000輛，數字亦未必有份提振股價，Steven又指，即使見到今日吉利升到10%，都要睇整個板塊係咪可以維持熱度。
