【Now財經台】截至早上11點，1小時內《彭博》用戶關注度上升最多嘅港股，依次為中國華融(02799)、新奧能源(02688)、中國海外發展(00688)、美團(03690)、港交所(00388)。
中國華融重組期間，股份經常上榜有名，而今日上榜係因為隔晚盈警，預料中期轉蝕188.78億人民幣，去年賺1.58億人民幣，投資公允值虧損、房地產行業下行都係盈警原因，相關客戶履約能力下降，資產跌價，所以要做減值損失。經濟下行周期對呢類股份本身已經不利，依家仲要關連到房地產，係咪好難先翻身呢？
獨立股評人譚智樂指，依家選擇入手華融嘅投資者主要都唔係考慮翻身，重點在於情況係咪可控，今次公司虧損金額相對大，市場會擔心公司會唔會開始控制唔到，持有呢隻股份嘅投資者依家都應該幾乎「損手爛腳」，建議投資者唔好隨便加碼，有貨嘅投資者要做好風險管理，考慮風險承受能力，華融屬於高風險股份，不建議短線搏技術反彈。
