【Now財經台】弘業期貨(03678)喺深交所在開市前公布，因應弘業A股上市滿10個交易日，按相關規定納入港股通。弘業H股今朝高開逾10%後，愈升愈有，一度高見2.1元，爆升逾60%，其後升幅略為收窄，成交亦配合升勢，暫時成交金額逾9000萬元，成交股數計，較過去100日同時段激增逾600倍。
弘業A股喺8月5日上市，今日係第11個交易，A股招股價1.86元人民幣，上市首日炒高44%，往後10個交易日都漲停，今日創6.97元人民幣上市新高，較發行價升咗2.7倍。
睇返弘業H股表現，由A股掛牌到昨日，表現只係一般，直至今日納入深港通下港股通，喺北水追捧下大成交爆升，不過，今日一升，14天RSI已逼近90嘅嚴重超買水平，暫時留意住2元整數關口，收市時係咪企得穩。
