【Now財經台】截至早上11時止，1小時內《彭博》用戶關注度上升最多港股，依次為舜宇光學(02382)、中駿集團控股(01966)、海螺水泥(00914)、交通銀行(03328)、國泰航空(00293)。
iPhone14開始出貨，一眾Apple概念股中，舜宇呢隻龍頭股其實8月初升咗唔夠半個月，就反覆跌到依家，即使早前出咗iPhone 14都炒唔起，雖然有分析師上調出貨預測，但有內地網民指已炒燶機，似乎舜宇要炒得起，前提係先要iPhone炒得起？
獨立股評人譚智樂指，炒作新iPhone消息其實只係一日嘅事，投資者見到交貨時間好遲，有錯覺以為新電話多人買，但其實只因市場供應鏈緊張，全球經濟向下時，非必要開支整體需求只會減慢，包括換機。
Arnold補充，見到舜宇中期業績嘅毛利率跌咗好多，下半年壓力只會更大，所以對股價破底唔會感到意外，更提醒投資者唔好隨便估底。
