【Now財經台】汽車板塊今日跑輸大巿，其實近排好多品牌都有新車發布及推出市場，例如噚日首掛嘅零跑汽車(09863)就有新車C01上巿，長城汽車(02333)亦有新一代新能源車，呢啲車企係咪都睇中「十.一」黃金周長假，諗住趁機谷銷情？
寶鉅證券董事及首席投資總監黃敏碩指，策略上，汽車品牌都會趁國慶假期谷銷量，希望喺第4季為全年盈利作最後衝刺，例如小鵬汽車(09868)今年首3季都冇乜大動作，反而上星期先推出重點產品，正正係要把握呢個黃金時機。佢又話，投資者可以留意汽車股承唔承接到7月、8月嘅銷售優勢。
