【Now財經台】豐盛控股(00607)今日成為港股跌幅榜榜首，但公司未見傳出重大利淡消息，股價今朝平開後，好快轉跌，午後跌勢顯著加劇，一度急瀉逾39%，低見0.155元。
除大股東外，豐盛主要股東包括中國銀行(03988)、中國華融(02799)等，依家中行及華融分別揸住11億和16億股，雖然成交有逾2億股，但中行及華融係比較有實力嘅企業，被斬倉嘅機會較低，因此，可以排除主要股東被斬倉導致股價大跌嘅可能。
值得留意係，豐盛股價8月底開始因業績理想造好，至今已累升約1倍，而公司分別喺5月及7月，以0.1元及1.1元配股集資，而2次配股都冇禁售期，計返都有逾倍回報，要獲利都唔出奇。
豐盛股價今日喺大成交下插水，14天RSI跌到46水平，而股價落到50天線都有支持，即0.155元，但MACD快線跌穿慢線，出現弱勢訊號，投資者都要留意。
