【now.com財經】今朝揀咗隻恒指牛(55304)出嚟，本以為指數靠近返熊證街貨層會爭氣少少，但原來推高都係出機會出淡倉。本身計劃好喺五分鐘圖上見指數向上突破「長方形」先至落場，不過呢個「長方形」反方向突破。喺今朝11點，指數失「長方形」之餘，仲失埋保歷加通道中軸，好倉完全開唔到嘅同時，見保歷加通道口有拓闊嘅情況，既然係咁，好倉唯有放埋一邊，同時作戰室都換上淡倉出動。
望望月曆，聽日28號除咗喺我個中學老死生日之外，亦都係結算日，結算前夕指數炒高托住轉倉的確係平常事，但只係托得嗰個零鐘又真係肉酸咗少少；一係就無咁多貨需要托，一係就無咁多基金需要托，隨時佢哋個倉同你個倉一樣，晨早「清零」。
下半場開始之後指數有曾向上跳高掂50分鐘線(五分鐘圖10線)，不過，淡友似乎仍然人多，指數亦都只係掂一掂50分鐘線之後再向下行，去到1點9分已經到咗作戰室淡倉即市目標250分鐘線(五分鐘圖50線)。
坦白講以目前指數擺位，1點12分報15,555點計，牛熊證中間位15,599.5點，實數算是企返落去靠近牛證街貨層(低於牛熊中間位)，但鬆一啲計其實指數只係落返去牛熊中間位附近(1點15分恒指稍回返上去15,599點)，以目前恒指牛熊兩邊見，牛證今日最貼價出到收回價為15,568點，即聽日返嚟會見到牛證街貨層新增至15,500至15,599點；而熊證最貼價出到收回價見15,870點，即聽日返嚟見到熊證第一層落到15,800至15,899點，用呢個嚟計中間位的話，則比今日嘅向上移高100點，見15,699.5點。若然今日指數收市企喺15,599.5點至15,699.5點之間，好淡爭持情況將會繼續，指數橫行機會率較高，到時要再秤向邊一邊行機會高啲嘅話，就要留意聽日嘅牛熊證街貨倒底儲到有幾多返嚟啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
