【Now財經台】蔚來(09866)第3季車輛銷售額首次突破百億，達到119億人仔，較第2季增長近25%。雖然公司淨虧損擴大至超過41億元人仔，毛利率又跌，但仍無阻股價績後大反彈，今日最多抽升逾20%。究竟應該點解讀呢個情況？
紅蟻資本投資經理李澤銘指出，蔚來淨虧損擴大幅度及毛利率跌幅都遠差過市場預期，認為股價純粹因噚日創咗上市新低後，今日跟隨大市借勢反彈。
雖然蔚來股價月初一度勁彈，但仍未扭轉近2個月嘅跌勢，加上公司基本面麻麻，Alan認為，公司最壞時期仍未過去，亦質疑今季車輛交付未必可以達標。
蔚來估計，第4季車輛交付量介乎4.3萬至4.8萬部，但Alan指，公司10月只售出約1萬部車，而過去單月銷售從未超過2萬部水平，相信要喺11月至12月達標有難度。佢又直言，股價仲有下行，甚至再破底風險，建議有貨嘅投資者盡快趁高位獲利回套。
