【Now財經台】截至早上11時止，1小時內《彭博》用戶關注度上升最多港股，依次為雅生活服務(03319)、中國交通建設(01800)、交通銀行(03328)、領展房產基金(00823)及中國海洋石油(00883)。
雅生活今朝有大手賣出約2363萬股，每股成交價7.31元，較噚日收市價8.6元，有15%折讓，涉資1.73億元，佔流通股份約3.3%。賣盤規模唔細，雖然港交所(00388)暫時未披露賣家資料，但疑似係大股東減持。
雅生活股價今朝平開後最多跌近7%，低見8元後回升，半日微升0.6%，報8.65元。
獨立股評人譚智樂認為，母企雅居樂集團(03383)同好多內房企業一樣面臨資金鏈斷裂風險，唔排除集團未來打算出售資產救亡，但佢話內房股股價短期更受市況波動影響，認為雅生活疑似被大股東減持嘅消息其實唔會拖累股價太耐，強調目前有貨嘅投資者只能局守，唔建議溝貨。
