【Now財經台】物管股爆股東減持潮，繼碧桂園(02007)一個月內兩度「抽水」後，同系碧桂園服務(06098)大股東楊惠妍減持約7%股權，套現約50億元，趁高沽貨套現。至於旭輝控股集團(00884)亦計劃標售持有嘅旭輝永升服務(01995)持股，呢啲消息會對板塊氣氛帶來負面影響，還是有投資者肯接貨釋出一個正面訊號？
星展銀行(香港)豐盛私人客戶執行董事鄧威信指，其實市場都對內房配股有心理準備，個別配股嘅公司槓桿比率高，部分因為見息口高企，大股東減磅做啲財務安排，短期內難免對公司或市場氣氛有少少影響，但對大市上升動力影響有限。
Wilson又話，大市始終要睇估值，暫時仍相對較平，預測市盈率(PE)僅約8倍，早前，有大型基金減持港股、中資股，升完一浸之後，估值喺現水平仍然係平，相信有上升空間，呢啲配股消息只會有短暫影響。
