【Now財經台】政府進一步放寬防疫措施，包括明日開始唔使掃安心出行及取消黃碼等，此外，有本地傳媒引述消息指，本港同內地最快下個月可以通關，雖然通關概念股近排都升咗唔少，但同2019年爆發疫前情、未封關前高位比較，其實仲有一段距離，隨著政府陸續放寬防疫措施，呢啲股份係咪可以望住疫情前高位嚟炒？
華盛証券經紀部董事李偉傑認為，明年的確有機會通關，而用2020年初高位去估計股份反彈空間係合理，雖然唔同行業喺過去3年面對嘅困難都唔同，但仍可以作為初步參考。
佢又話，以收租股為例，希慎興業(00014)、領展房產基金(00823)，現價同2020年初有一段距離，依家呢股氣氛喺市場逐步擴散，預期收租股會穩步向上。Jason續指，見到過去1個月內地防疫措施出現180度轉變，相信香港都會跟隨內地嘅防疫方向，而現在嘅方向亦係正面。
