【Now財經台】內地調整防疫政策，大幅放寬相關措施，為復常踏出重要一步，雖然經濟未完全復甦，但股市氣氛已明顯好轉，市場普遍睇好港股2023年可回勇，但受惠於放寬防疫措施嘅股份，以及航空板塊係咪已提前反映咗？
利得證券香港董事總經理王榮昆指，提前反映得最多係餐飲板塊，尤其係火鍋股，呢類股份早喺11月，內地仍未調整防疫政策時，已重返「二十大」前水平，跑贏其他相關股，亦見到外資不斷撈貨。
不過，James認為，呷哺呷哺(00520)、海底撈(06862)等餐飲股其實欠缺上升邏輯，雖然內地北方一線二線城市疫情已受控，但南方城市如深圳、廣州等疫情仲未見頂，外出打邊爐嘅人可能只係個別例子，餐飲股要重返去年7月前水平，相信仍要多啲時間，佢又指，呢啲股份炒上現水平有啲唔合理。
