【Now財經台】金山雲(03896)上市4日就升足咁多日,暫時累升80%,金山雲係以介紹形式上市,所以冇發新股集資,可能限制咗股份流通量,從呢個角度睇,金山雲係咪更好炒?
艾德金融聯席董事陳政深指,金山雲絕對比一般IPO股份更好炒,因為炒股係講供求,睇返中央結算及交收系統(CCASS),金山雲喺CCASS嘅持股量佔已發行股數46.69%,而大部分由1家大行持有,形成咗股價持續向上嘅因素,其實不論係集資還是以介紹形式上市新股,升得勁都係同供求有關。
Ryan又話,股份街貨少就好易夾高,亦係股價波動嘅助燃劑,金山雲作為一隻新股,發行股數相對少,加上市值唔係太大,股價再夾多浸唔係冇可能。