【Now財經台】眾安在綫(06060)發全年盈警，預告去年由盈轉虧，估計蝕最多15億人仔，主要係投資收益大減，以及美元兌人仔升值，導致相關債券錄得匯兌損失，不過，全年總保費收入按年增16%，到底眾安嘅核心業務靠唔靠得住，股價未來有幾大壓力？
博威環球資產管理金融首席分析師聶振邦指，眾安近5年總保費收入都有增長，但舊年增速比前年慢，成績亦唔算標青。佢又話，公司2019至2021年扭虧為盈，主要係公司投資有道，但舊年投資收益大跌，成為賺變蝕嘅元兇，反映投資收入對公司影響好大。
聶Sir續指，眾安主打線上保險，但近幾年疫情刺激同業研發相關技術，令公司喺科技層面嘅競爭優勢細咗，因此，股價要上返40元水平機會唔大。
