【Now財經台】九龍倉置業(01997)去年轉蝕88.5億元,業績公告嘅標題開宗明義就話係因為「疫情困境加財務成本攀升」。
公司去年財務支出達18.6億元,較2021年嘅7.6億元升逾1倍,期內,實際借貸年利率亦由前年1.4%升至2.5%。南華金融集團高級分析師莫灝楠認為,公司嘅借貸年利率已經算升得少,可見財務穩健,但今年下半年美國仲有機會加息,到時借貸成本可能又再重啲。
此外,投資物業重估虧損亦拖累九置轉虧,睇返撇除物業估值嘅基礎淨盈利,其實按年只跌5%至61.7億元。Casper就話,重估虧損只係非現金虧損,估計公司可能想將影響業績嘅負面因素留返喺去年嘅財務報表,認為業績嘅最壞情況已經過去。