【now.com財經】 今朝揀咗隻恒指牛(67288)出嚟，計劃借50分鐘線(五分鐘圖10線)+500分鐘線(五分鐘圖100線)托得住指數嘅偷位出動。
睇返今朝Patreon出文時間為10點9分，如常on top加多10分鐘作為睇文時間，即10點19分時再望返個星期五分鐘圖，其實當時50分鐘線已經上破咗100分鐘線，成為同指數最靠近嘅平均線，同一時間指數亦見有少少彈起。稍等到10點30分，指數輕輕回落到50分鐘線水平，(67288)可以偷位出動。一如以往的用返10分鐘作為入市時間，即按10點30分至10點40分，(67288)高低位做過0.064元/0.057元，平均買入價為0.0605元。
落場後，指數有一段短時間都串住條50分鐘線，乃念整條保歷加通道向上運行，承如今朝所指呢個時侯指數或稍為退一步要問中軸借力，還好中軸同50分鐘線嘅距離都唔係好遠；更Lucky嘅係指數喺11點5分確認重上50分鐘線之上，只不過喺係11點半見到高位出現「射擊之星」，去到上半場完結前10分鐘，指數先至失守50分鐘線，既然借呢條線嚟偷位出倉，失守時亦都可以當係走貨訊號，由11點55分起計至上半場完場，如果走隻(67288)不過Lunch的話，期內(67288)高低位做過0.072元/0.071元，平均走貨價為0.0715元，呢個朝早平均賺幅已袋咗11格或18.18%，不枉我今朝左眼眼皮跳咗成朝咁滯(戰友話左吉右凶喎)；但到Lunch time時我隻左眼間唔中仲跳緊，我懷疑再跳落去今日下半場我要單眼睇市。
睇返今日上半場指數最高見過19,597點，第一層熊證19,400至19,499點嗰55張期指一早食完兼抹埋咀，而按上半場高位計，只係爭三點就可以全數吞埋19,500至19,599點嗰351張期指，但當睇返實際熊證擺位時，其實喺19,500至19,599點呢層，最大收回價只係19,550點，再跳就跳到去19,600點收回，換言之其實19,500至19,599點嗰層都全數無晒貨喺度，即係話指數其實已經吞咗406張期指落肚。
下半場只係開始咗6分鐘，暫時都未見到指數有一個明確方向，睇埋小時圖嘅話，抱住指數靠近熊證街貨嘅實質情況，50小時線(小時圖50線)都希望可以上得到嘅；不過今朝一注都夠我家肥貓再買多盒小魚乾仔做零食，Happy Friday!
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
