【now.com財經】今朝喺呢度無做過咩動作，不過喺作戰室出動淡倉，兩轉淡倉出動後幾經辛苦都終於爬到有正數。而上半場低位見過18,988點，莫講話日線圖150天線，連19,000點都無埋，牛證重貨區19,000至19,099點確認全數被收回，今個朝早指數全數吞咗相當於1,172張期指。
攞返個日線圖出嚟，見到指數踩過150天線少少，「平底三角形」嘅底當然都失少少，Slow STC(14,3)兩線已經處於嚴重超賣水平，兩線目前向住零嘅方向出發；換上保歷加通道的話，則見到整條保歷加保持向下運行嘅隊形。「咁幾時先可以再等得到指數同Slow STC(14,3)喺向下緊嘅保歷加通道裡面出觸底呀？」假設指數Keep住玩一日升一日跌咁庄閒庄閒落去的話，咁咪聽日會升返嚟。
下半場開市，見到指數喺半場開市後唔駛3分鐘，再做多一個新嘅Day Low出嚟，依家1點4分，指數低見18,955點，嚟到呢啲位大家都開始將淡倉收割，等位換成好倉出場。以按今日熊證最貼價收回價見1,9400點計，指數現價(15分報18,968點計)同呢口價爭432點，話距離得好遠而單邊向下殺牛又未似，事關今日指數都已經跌緊550點，所以嗰400幾點隨時一日搞掂，要比嘅可能就係貨量嘅問題，估計聽日返嚟隨時18,700或18,500點會見重貨都唔奇，但有幾重就仲未知。
恒指熊(56856)就出隻收回價19,400點做下Day Trade，以五分鐘圖指數唔過中軸為由出隻淡倉，順住依家所見嘅整條保歷加通道向下運行；過中軸嘅咪退至頂線觸頂先至出手囉。比較想嘅係等到臨完場前5分鐘，睇下條Slow STC(14,3)擺喺邊，如果擱喺超買範圍的話，淡倉仲可以再博聽日返嚟見Slow STC(14,3)超買觸頂出Swing向下；反過來Slow STC(14,3)真係喺超賣位收嘅，小注好倉同樣博Slow STC(14,3)超賣觸底第二日推返上去唔反對嘅，但過夜注自己要計一計數，一來計一計過夜注唔好太大注啦，最好係第二日瞓醒發現被打靶都唔好心痛嗰隻；第二嘅係過夜證通常都會搵到有最少500至600點距離，開咁大個裂口嚟被人打死嘅話，都真係無嘢好講啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
