【Now財經台】央企軍工股中船防務(00317)A股今朝一度漲停板，H股亦走強，今朝高開逾2%，開市即重上10元，其後升幅一度擴大至逾7%，成交股數較過去100日同時段平均增近3倍。
國資委黨委噚日召開擴大會議，強調將以更大力度鼓勵及支持中央軍工企業「做強做優做大」，積極支持國防軍隊建設。中船防務係央企中國船舶集團旗下大型造船骨幹企業，以及國家核心軍工生產企業，自然受惠於呢個消息。
中船防務上周已升穿上升通道頂，後市要留意9.7元嘅上升通道頂位置企唔企得穩，集團下周四會出業績，要留意扣除投資收益嘅核心業務，即船舶製造業務表現有冇驚喜。
