【now.com財經】今朝揀咗隻恒指牛(57098)出嚟，Set好等緊指數喺五分鐘圖同保歷加中軸相遇後見支持先至出手。不過，等到11點先到指數落到中軸附近時，諗都唔諗就向下穿咗落去，符合唔到(57098)出場條件，唯有再等；當然玩開Swing，甚至係睇開呢個專欄知道可以轉用Swing Trade嘅亦都可以改變策略，轉用五分鐘圖嘅Slow STC(14,3)落到超賣位時出動，同噚日玩法一樣，等返Slow STC(14,3)上返去超買水平就完成呢一注。
又咁啱，過多五分鐘就已經見到Slow STC(14,3)兩線落到超賣至嚴重超賣範圍，呢個位係可以出(57098)，如常的用返10分鐘作為買貨時間，即11點5分至11點15分，以(57098)期內高低位做過0.046元/0.04元計，平均買入價為0.043元。
不過，由落場至上半場完結前，指數都只係處於窄窄的保歷加「下降通道」，未能成功抽高，同時Slow STC(14,3)亦都只係抽到上中軸就止步。
下半場開市之後，情況未見有好大變化，喺1點10分左右計過保歷加通道頂至底線只係爭81點，窄到無論。同步只係見到指數稍稍高衝過中軸，Slow STC(14,3)都只係上到60幾至70幾之後再向下回落返去底線水平，咁窄嘅位講真指數好易一步到位，問題在於Slow STC(14,3)係唔係回到上中軸之後就沒然後啫。
如同噚日嘅做法，拉條底線出嚟做止蝕位，一失即走，事關Slow STC(14,3)喺中軸位都如同五五波賭大細一樣，平平靜靜等今晚議息結果算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
